Saturday 18 February 2017

ఘాజీ .... గివ్ క్లాప్స్

ఘాజీ  .... గివ్ క్లాప్స్ 

సంకల్ప రెడ్డి , 
ఇప్పుడు మొత్తం క్రెడిట్ నీకే ఇవ్వాల్నా !
విత్తనాన్ని సంరక్షించి నీ సంకల్పంతో 
అందరి సహకారాన్ని సాధించి వెండితెరకు 
ఒక ఇంగ్లిష్ మూవీ తెలుగు సినిమాగా ఇచ్చావు 
చూడు , ఆ కాన్ఫిడెన్స్  ఇవ్వాల్సిందే . 

గుడికి వెళదాము అని గూడూరుకు వెళ్లిన మమ్మల్ని 
 హర్ష సిరి ఆపేసారు , పిన్ని ఘాజీ చూడాల్సిందే . 
హిందీ మూవీ నా ? కాదు తెలుగు ?
ఇదేమి పేరు ? నా దృష్టిలోకి రాకుండా ఈ సినిమా 
ఎలా తప్పించుకుంది అనుకున్నాను . 

పిన్నీ అది పాకిస్తాన్ సబ్ మెరెన్ పేరు . దానిని ఎలా 
కూల్చారో చూపించారు . ఇప్పుడే నెల్లూరు లో 
చూసాను . నువ్వు చూడాల్సిందే , అంతే . 
అనేశాడు మా హర్ష . 

వీడి సంగతి నీకు తెలీదు , ఇంతకూ ముందు 
 యుగానికి ఒక్కడు అర్ధం కాకపోయినా చూపించాడు . 
అంటే ఇది కూడా ఖఛ్చితంగా అర్ధం కానీ క్యూట్ 
వెరైటీ సినిమా  అనుకున్నాను . 
అది  నిజం కూడా అయింది . ఎలాగూ మా నాయుడుపేటకు 
బాబుల భజనలు , వాళ్ళ బిడ్డల సినిమాలు తప్ప ఇవి 
రావు . ఇక్కడే చూడాలి . 

 కార్ లో చెప్పాడు వాడు నీ గురించి . 
ఇంత చిన్న వయసులో ఈ కథను ఆవిష్కరించాలి 
 గురించి , 25 లక్షలతో సెట్ వేసి అందరికి నీ పట్టుదల 
చూపిన సంగతి . దానిలో నీ  విశ్వాసం కనిపించింది . 
ఇంట్రెస్టింగ్ అనుకున్నాను . 

మొదట అర్ధం కాక ఊ , ఆ , అనుకున్నవాళ్ళం ఎప్పుడు 
సబ్మెరిన్ కి ముందు సీట్ పై తల ఉంచేంతగా వెళ్ళామో 
మాకే తెలీదు . ఒక టైటానిక్ గుర్తుకు వచ్చింది . కానీ 
దానిలో  జీవితాలు అల్లుకొని కథను ముందుకు నడిపాయి . 
ఇక్కడేముంది పైకి కిందకి , కిందకి పైకి , ఆ పాకిస్తాన్ 
కెప్టాన్ అన్నట్లు లిఫ్ట్ లాగే . 

 దీనిలో నువ్వు ఎన్ని కాంఫ్లిక్ట్స్ చూపగలవు ?ఎన్ని జీవిత 
సత్యాలు మా ముందు నిలుపగలవు ? 

కాదు కాదు , మర్రి విత్తనం లోని మహావృక్షాన్ని మా ముందు 
ఆవిష్కరించావు . ఒక నీలం , చీకటి అనే రంగులు తప్ప 
ఇంకేమి చూపలేని సినిమాలో ఒక మనిషి లో ఉండే 
అన్ని రంగులు చూపావు . 


ఒక సైనికుడి ప్రపంచం ఎంత  విశాలమో 
తన దేశం గెలవాలనే తపన 
ఎలా ఉంటుందో చూపావు , 
డిఫెన్స్ మనస్తత్వం గల ఒక దేశం తో పనిచేస్తూ 
మనిషి పడే అవస్థ , వార్ నెవెర్ ఎండ్స్ అని 
చూపుతూ బులెట్లకు బలి అయిన జీవితం తన 
వారిమీద  ప్రభావాన్ని , కఠినమైన నిర్ణయాలు 
తీసుకొనే వారు కూడా పిల్లల దగ్గర మారే పిల్లతనాన్ని , 
ఒక జీవం మరణం మధ్య గీతకు అటూ ఇటూ ఊగుతూ 
కూడా తమ వాళ్ళను రక్షించాలి అని పడే తపనను 
మాచే ఊపిరి తీసుకోనివ్వకుండా చూపించావు . 
పాటలు లేకుండా తెలుగు సినిమా తియ్యొచ్చుఁ , 
ఇక్కడా ప్రతిభ ఉంది అని నిరూపించావు . 

నాకు అనిపిస్తూ ఉంటుంది , చదువు  పూర్తి అవగానే 
సంపాదన లోకి యువతను తోసెయ్యకుండా కొద్ది 
రోజులు ఏదో ఒక స్కాలర్షిప్ ఇచ్చి వారి సృజనాత్మకత 
నిరూపించుకోమంటే యెంత బాగుంటుంది . కానీ 
ఇండియా లక్ష్యం  సంపాదనే . అదీ కాక మీరు బాడ్ హాబిట్స్ 
లో దిగే వయసు కూడా అదే కాబట్టి రిస్క్ తీసుకోలేము . 
ఎలాగో లోపల ఫైర్ నిలవనీని నీలాంటి వాళ్ళు 
అడ్డు వచ్చిన బండరాళ్లు సైతం పగలగొట్టుకొని పైకి 
వచ్చి చిగురిస్తారు . 

కొంచెం చివరిలో సినిమాటిక్ గా ఉంది , విలన్ తెలుగు 
లాగే చూపారు , కొందరు ఫీలింగ్స్ చూపలేదు అని ఉన్నా 
అవి ఈ సారి దిద్దుకోవచ్చూ . బాల్కనీ లో కూడా 
చప్పట్లు మోగడం చూసాను . నువ్వు ఉత్సాహంగా 
ముందుకు వెళ్ళవచ్చుఁ , అందరినీ కలుపుకొని .  

తాప్సి ఉన్నా తనను ఏమీ వల్గర్ గా చూపలేదు . 
మరీ విలువలే లేని సినిమాలు చూసి విసుగ్గా 
ఉంది . మరీ ఎప్పుడూ వ్యాపారమేనా ? 
కాకుంటే కాన్సెప్ట్ హై గా ఉంది . అందరికీ అర్ధం కాదు . 
ఇనొంచెమ్ సబ్ మెరైన్ పని తీరు ఎవరైనా వీడియో 
చూపుతున్నట్లు చూపాల్సింది . ప్రెషర్ అంటే కూడా 
చాలా మందికి అర్ధం కాదు . మాన్యువల్ అంటే 
తెలీదు , 
విశ్వనాధ్ గారు చూడు ,బాపు గారు చూడు ఒక 
క్లాసిక్ మూవీని కూడా అందరికి దగ్గర చేసి పడవ 
నడిపే వాడి చేత కూడా పాడించేస్తారు . మన 
హృదయం లోకి వచ్చేసి విలువలు పాటించు 
అంటారు . కళకు ఇదే కదా ప్రయోజనం . 

నీలో ఫైర్ ఉంది . దానిని అందరికి దారి చూపేట్లు 
వెలిగించు . వాళ్ళ దారిలోకి వెళ్లి ఒప్పించు . 
నువ్వు వేసిన దారిలో నడిపించు . 

సినిమా కళామతల్లికి పట్టుచీరె కట్టినంత పద్దతిగా 
ఉంది . మీ అమ్మ కడుపు చల్లగా , 
ఆ అమ్మకి నమస్కరించినంత తృప్తిగా ఉంది . 
ఆశీస్సులు . 
                                     ఒక బిటెక్ కుర్రవాడి అమ్మ 
                                               వాశశి 

Tuesday 14 February 2017

ప్రేమతో ఒక అడుగు

 ఇప్పుడు కోట్ల హృదయాలు లో 
ఒకటే నినాదం 
అందరి ఆశలు విజయం చేరాలని 

నింగికెగసే ఒక్క జ్యోతి 
శతాధిక ఉపగ్రహాలను గమ్యం చేరుస్తూ 

అక్కడ కక్ష్య లో తిరిగేవి 
ప్రాణం లేని ఉపగ్రహాలు కాదు 
గగనాన భారతదేశం ఎగురవేసిన 
కీర్తి బావుటాలు 

గెలవాలి పి . ఎస్ . ఎల్ . వి సి 37 
నిలపాలి భారత కీర్తిని నింగిన  వేగుచుక్కలా 

రేపటి ప్రయోగం  చరిత్రగా నిలిచిపోవాలి 
భారతదేశం గెలవాలి 
ఆ గెలుపు నీది నాది మనందరిదీ 

              ******** 
ఫిబ్రవరి 15 , 2017 ఖగోళపు విజయాన్ని నమోదు 
చేయపోతుంది . ఎన్నో విజయాలు మనకు 
అందించిన పి . ఎస్ . ఎల్ . వి ద్వారా ప్రపంచం లోనే 
మొట్టమొదటగా 104 ఉపగ్రహాలు (మూడు మనవి , మిగిలినవి 
విదేశాలవి ) కక్ష్యలో ప్రవేశపెట్టపోతున్నారు . 

శ్రీహరి కోటకు దగ్గరలో సూళ్లూరుపేట కూల్ లో పనిచేస్తూ 
నేను కూడా పిల్లల చేత ఏదో ఒకరీతిలో శుభాకాంక్షలు 
చెప్పిద్దాము అనుకున్నాను . ఎలా ? ఇదే ఆలోచిస్తూ ఉన్నాను . 

మంచి సంకల్పానికి విశ్వము ఎప్పుడూ తోడే . 
సైకత శిల్పం చేయమని సెక్రటరీ గారి నుండి ఆదేశం . 
గైడ్ కూడా వచ్చారు , సనత్ . 

ఉదయమే పిల్లలు మేము కాళింగి నది ఒడ్డున మొదలు 
పెట్టాము . ఒక మంచి పని చేస్తున్నాము అనే భావనతో 
మనసు చాలా ఆనందంగా ఉంది . పైగా పక్కనే 
చెంగాళమ్మ కు చేస్తున్న కోటి కుంకుమార్చన మంత్రాలు , 
మాకు కొత్త శక్తినిస్తున్నాయి . 
ఎండను లెక్క చేయకుండా ఒకే దీక్ష , ఒక మంచి 
సందేశాన్ని ఇస్రో వాళ్లకు ఇచ్చి శుభాకాంక్ష తెలియచేయాలని . 
చిన్నారి చేతుల్లో ఒక రాకెట్ భారత పతాకాన్ని గుర్తు చేస్తూ 
ఊపిరిపోసుకుంది . 

చేసిన పనికి ఎదురుగా నిలబడిన సైకత శిల్పం 
చూస్తుంటే ఏంటో తృప్తి మా అందరిలో . 

మొన్ననే వీరభద్రుడి గారి ప్రేమ మీద వ్రాసిన కవరుపేజ్ స్టోరీ 
చదివాను . ఈ  ప్రేమికుల దినోత్సవం రోజు అది మళ్ళీ 
గుర్తుకు వచ్చింది . ప్రేమలో కూడా కొన్ని స్థాయిలు ఉన్నాయి . 
మొదటిది నాకు మాత్రమే నువ్వు సొంతం కావాలి , మొత్తం 
నాకే కావాలి అనే ప్రేమ . ఇందులో ఒక్కరు మాత్రమే ఉంటారు . 

రెండోది నువ్వు సంతోషంగా ఉండాలి . నువ్వు సంతోషంగా 
ఉంటేనే నేను ఆనందంగా ఉంటాను అనే ప్రేమ . 
దీనిలో మనం  కూడా ఉంటారు . 
ప్రేమ ఇక్కడ తన పరిధిని పెంచుకుంటూ పోతుంది . 
తన నుండి మన కు వెళుతూ . 

మూడోది అందరు బాగుండాలి . విశ్వం బాగుండాలి అనే 
ప్రేమ . ఇది మొత్తం సృష్టి నే తనలో ఇముడ్చుకోగలదు . 
ఆధ్యాత్మిక మార్గం లో సృష్టింపబడిన ఈ ప్రేమ ప్రతి ఒక్కరి 
సహానుభూతి పొందుతుంది . 

మరి ఈ రోజు ఒక జాతి ని మొత్తం మా ప్రేమ లో ఉంచుకొని 
ఆ అత్యున్నతమైన ప్రేమ వైపు వేసిన అడుగు ఇది 
అనిపించింది . 

మనం ఒక్కోసారి ఒక్కోలాగా కనిపిస్తూ ఉంటాము . 
అవన్నీ సముద్రం పైన ఎగసిపడుతున్న అలలే . 
ఎవరు అందులో తొంగి చూస్తే వారి ఆరా లోని 
అనుభూతే అక్కడ కనపడుతుంది . స్నేహం అయితే స్నేహం 
ప్రేమ అయితే ప్రేమ  కోపం అయితే కోపం  . ఈ పై పై అలలు అన్నీ 
పక్క వారి మనసు సృష్టి . 
లోతులో గంభీరంగా సాగే సముద్రమే మనం . 
అక్కడ జరుగుతున్న ప్రయోగాలు ,ఒక్కో అడుగుగా
మనలోపలికి చేసే ప్రయాణాలు ఎవ్వరికీ కనపడవు . 

ఒక్క సంతోషకరమైన విషయం ఏమిటంటే మనకు 
తెలీకుండానే ప్రతీ జన్మకి మనలోని ప్రేమను 
విశాలం చేసుకుంటున్నాము . 
మనిషి మనిషిగా మారడం కంటే కావలిసినది ఏముంది !

అతని నుండి స్వార్థరహితంగా ఇచ్చే ప్రేమ తప్ప సృష్టి 
ఆశించేది ఏముంది . 
                                    @@@@@@