నక్షత్ర మిత్రులు ఎలా వచ్చింది !!

చాలా మంది మోస పోయే విషయం "ఒక రచన తామే చేస్తున్నాము
అనుకోవడం "
మేమే కదా వ్రాసేది అంటారా ,మరి అంతకు ముందు లేని
ఒక ఆలోచన తళుక్కున ఎలా వచ్చింది ?
దానిని అక్షర రూపం లో పెట్టడం ,సొగసులు దిద్దడం
మాత్రమె మీరు చేసేది .
ఇంకో విషయం తెలుసా ,కష్టపడి మీకు తెలిసిన దాంతో
తెగ ఆలోచించినపుడు కంటే ఏ ఆలోచన లేకుండా
మీ జనాన్ని తర్కాన్ని పక్కన పెట్టినప్పుడు ఇంకా బాగా
వ్రాయగలరు .
కావాలంటే "నక్షత్ర మిత్రులు " వ్రాసిన టే రా ,బార్బరా ఇద్దరినీ
అడగండి . వాళ్ళే చెపుతారు వాళ్ళ మాటల్లో ......

మీ చేతిలో పూర్తీ కావాల్సిన పుస్తకం ,వ్రాసేదాకా అన్ని పనులకు
అడ్డం నిలిచి మీ చేత ఆ పుస్తకం ఎలా విశ్వ శక్తి వ్రాయిస్తుందో !
అలవోకగా దానిని ఎలా మార్చుకోవచ్చొ !

ఈ పుస్తకం వ్రాయాలి అనుకున్నప్పుడు ప్లయిడియన్స్ చెపితే
వాటిని రికార్డ్ చేసుకొని వరుసగా వ్రాయడమే అనుకుంది టే రా

తీరా చూస్తె వాళ్ళు పుస్తకాన్ని చెపుతూ పోరాట,
మేము చెపితే నువ్వు వ్రాస్తే నువ్వు మర మనిషి లాగే అవుతావు
అని చెప్పేశారు .
నీ సహజ అవబోధనకు అనుగున్యంగా విషయాలు వరుసలో
ఏర్పరిచి ఈ పుస్తకం వ్రాయాలి . తర్కాన్ని , హేతువాద మనస్సును
పక్కన పెట్టాలి . ఇది నీకు జఠిలంగా అనిపించినా దీని తరువాత నువ్వు
ప్రజ్ఞ వెలిగే ఉన్నత తలాల లోకి ప్రవేశిస్తావు, ఓ సవ్యంగా అమరిక
, ఓ పరిపూర్ణం అయిన విశ్వాసము నెలకొన్న స్థితి లోకి ప్రవేశిస్తావు .
పుస్తకం పూర్తీ ఐదానికి గొప్ప పేరు వచ్చిన తరువాత

"ఎలా దాన్ని వ్రాసానో నాకే తెలీదు ! నిమిత్త మాతృరాలిని " అంటావు .

ఇంకా వాళ్ళు టే రా తో ఇలా చెపుతారు
"స్వంత విషయాలు వదిలి పెట్టగల వాళ్ళు అందరు విశ్వాత్మలో
సాదృశ్యాన్ని సాధిస్తారు "

"మీరు ఒక పుస్తకాన్ని వ్రాస్తున్నాము అని ముందే ఒక ప్రకటన చేయండి .
నీకున్న విశ్వాసం లేని వాళ్లకు ఈ పుస్తకం గందరగోళం గా ఉంటుంది .
సరైన సంకల్పం చెయ్యడమే నీ వంతు . పని జరుగుతుందని
విశ్వాసం తో ఉండు . రోజు నిద్ర పోయేటపుడు ఆ పుస్తకం మీద
అట్ట ఎలా ఉండాలో ఊహిస్తూ ఉండు ." అని చెపుతారు .

ఎంత కష్టపడినా పుస్తకం వ్రాయలేక పోతూ ఉంది టే రా
ప్లయిడియన్ల తో ఇంకో మారుపుస్తకం గురించి చర్చిస్తుంది .
అప్పుడు మనిషి ఎందుకు తాను అనుకున్న పని చేయలేడో
వాళ్ళు ఇలా చెపుతారు .....
"నీమీద నీకే విశ్వాసం లేదు టే రా ,పుస్తకం వ్రాస్తావు అని అందరికీ
చెప్పావు కాని నీమీద నీకే నమ్మకం లేదు .నీలో సంభవిస్తున్న పరిణామాల
గురించి నిజాయితీగా ఉండలేక పోతున్నావు .బయట ఉన్న నీ స్నేహితులు
అందరు నీ ఆస్తిత్వాన్నే ప్రతిభింబిస్తున్నారు. నీ ఉనికి పొరల లోనికి
చొచ్చుఁ కొని పోవాలి .లోనున్న ఆత్మా క్రోధం ,ఆత్మా ద్వేషం తొలగించుకోవాలి .
ఈ పుస్తక రచన నీకు అలాంటి సామర్ధ్యాలు ఇవ్వగలదు "

వాళ్ళ మాటల టేప్ లు వింటూ అప్పుడు తనకు ఏ భావాలు
మనడులోకి వస్తే అవి వ్రాసుకునేది ,కొన్ని వాక్యాల్లో , కొన్ని వ్యాసాల్లో .
వాటిని పుస్తకం గా ఎలా మలచాలో  తెళ్లేటం......
విసుగు పుట్టింది టే రా కి , చుట్టూ పరుచుకున్న కాగితాలు
చూసి ఏడుపు వచ్చింది . అన్నీ ఏరి పారేద్దాము అనుకుంది .
ఎరడం ప్రారంభించింది .......

క్రమం లేకుండా ఎరింది , ఒక సారి ముబడు పేపర్ ఇంకో సారి పక్కనది
అన్నీ ఏరి చేతికి తీసుకోగానే షాక్ !!
అదే బుక్ మొదటి అధ్యాయం .
అంతే కార్యాచరణ లో మన అడ్డే తొలగి పోవాలి .
సంకల్ప బలం ,చేయగలం అనే విశ్వాసం ....
ఆలోచన రహిత స్థితికి వెళ్ళగలిగాము అంటే చెయ్యాల్సిన
పని అదే ముందుకు వెళుతుంది .

మీ భయాలే మీ పనికి అడ్డము .
విశ్వాసం తో మంచి సంకల్పానికి ఎనర్జీ అదే వస్తుంది అనుకోని
పని చేయండి . పని అలవోకగా అయిపోవడం చూస్తారు .

                       ********************
ధ్యానంచేయండి . ఉన్న స్థితి నుండి ఉన్నత స్థితికి వెళ్ళండి

టీచర్ ..... మంచి పుస్తకం

టీచర్ ..... మంచి పుస్తకం 
పుస్తకాలు చదవడం అంటే నాకు జాలరి పిలకాయలకి 
సముద్రం దొరికినంత సంబరం . ఒక్కో సారి పద్దతిగా వరుసలో 
చదువుతాను . ఒక్కో సారి వెనుక వ్రాసింది , ఒక్కో సారి ముందుమాట , 
ఒక్కో సారి ఏదో ఒక పేజ్ ..... అదో సముద్రం అయినట్లు నా ఇష్టం ,
దానికి నాకు మధ్య పరిచయం పెరిగేటట్లు ,లేకుంటే చదివేది లేదు ... పక్కన పడేయ్యటమే . 
ఇదేదో నాకు తగ్గ పుస్తకం లాగుంది . 
వెనుక మాట చూస్తే టీచర్స్ ,తల్లి తండ్రులు కూడా బోలెడు సార్లు 
చదవాలి అనిఉంది . ఏముందబ్బ అంత గొప్పదనం !!!
చదివితే సరి . మామూలే ఏదో ఒక పేజ్ తీశాను . పిల్లవాడి చదువుకు 
డబ్బులు లేవని బడి మానిపించిన నాన్న ,పిల్లవాడిని చుట్టలు 
తెమ్మని పంపితే బడిని వదలలేక వాడు అక్కడే కూర్చొని బాధ పడే కధ . 
హ్మ్ .... నిట్టూర్చాను . 
ఎన్ని చూడలేదు నా సర్వీస్ లో . సగం లో మానేసే వాళ్ళు ,పెళ్లి చేసుకొని 
వెళ్లి పోయేవాళ్ళు .... నా శక్తి మేరకు కౌన్సిలింగ్ ఇవ్వడం ,కాని 
ఇంత మంచి సంభంధం వస్తుందని హామీ ఎక్కడ మేడం అంటే ,నేను 
ఎక్కడ ఇవ్వగలను ! :(
అరె ఇలాంటి కధ  కూడా దీనిలో ఉందే !!వారాల కృష్ణమూర్తి గారి 
కధ . నర్మద అనే తెలివి గల అమ్మాయి పెళ్లి కోసం డాక్టర్ చదువు 
వదిలేసుకోవడం . నదులు వృధాగా సముద్రం లో కలిసినట్లు ఎందరు 
ఆడపిల్లల తెలివి పెళ్లి లో కలిసిపోయింది ,అని మాష్టారు బాధపడటం . 
ఇప్పుడు ఇంటరెస్ట్ గా అసలు ఈ బుక్ కధా కమామీషు ఏమిటి అని 
మొదలుపెట్టాను . 
''కత్తి నరసింహా రెడ్డి ''గారి సంపాదకత్వం లో ''స్టేట్ టీచర్స్ యునియన్ ''
వారి ఆధ్వర్యం లో సేకరించిన టీచింగ్ కి ,విద్యార్ధుల కి సంబంధించి
సేకరించిన కధల పుస్తకం ఇది . ఇన్ని కొణాలుగా నా టీచర్ అనుభవాలను 
 ఇంత మంది అక్షరాలఅద్దం లో  చూసుకున్నట్లు ఉంది . 

చాగంటి సోమయాజులు ,సింగమనేని నారాయణ ,మధురాంతకం రాజారాం ,నామిని ,

సాకం నాగరాజు ,సుధామూర్తి ,చుక్కా రామయ్య ,అబ్దుల్ కలాం గారు ఇంకా ఇప్పటి 

వారు అప్పటి వారు ఎవరైతేనేమి చదువు గొప్పదనానికి చేతులు మొక్కిన వారు ,

గుండె గోడలకి అక్షరాలతో ఆలోచనలు అద్దిన వారు .... మొత్తం ముప్పై . బాపు 

గారి కధ చదివితే ఎదిగే కొద్దీ ఒదిగిన గొప్పదనం ,పుస్తకాల విలువ ..... 

అబ్బ ! చక్కని సేకరణ . చక్కని ముద్రణ . తప్పకుండా నా లైబ్రరీలో ఉంచుకోవాల్సిన 

పుస్తకం . ఎందుకంటె ఉపాధ్యాయుడు నిరంతర విద్యార్ధి కదా :)

ప్రతులకు :

విశాలాంధ్ర బుక్ హౌస్ 

లేదా ,

కత్తి నరసింహా రెడ్డి 

3-2-798 ,ఎస్ . టి . యు భవన్ 

కాచిగూడ 

హైదరాబాద్ -27 

ఫోన్ : 040 - 24655753 

వెల : 150 రూ 

                                     @@@@@@@@@@@@@@@ 

మల్లాది గారి త్రీ మంకీస్ చదివారా ?

మల్లాది గారంటే ? ఇప్పటి వాళ్లకు కొంత ప్రశ్నార్ధకం . 
అప్పటికీ ఆయన ఎప్పటికప్పుడు తనను తానె మార్చుకుంటూ 
కాలానికి తగ్గట్లు కలాన్ని తిప్పుతూనే ఉన్నారు . ఈ మధ్య 
సాక్షి లో ఆయన ''త్రీ మంకీస్ '' సీరియల్ చదివితే ఇప్పటి అలవాట్లను ,
టేక్ ఇట్ ఈజీ లైఫ్ ని ఆయన ఎంత గా గమనిస్తున్నారో తెలుస్తుంది . 
ఇది పూర్తి అయిన తరువాత నేను వ్రాసిన ఒపీనియన్ ఈ రోజు సాక్షి ఫ్యామిలీ లో 
చదవండి . థాంక్యు సాక్షి . 

(3 monkeys pai naa sakshi opinion ikkada )

ఇప్పటి వాళ్లకి పుస్తకాలు విలువ తెలీదు చాలా మందికి ,
కాని విదేశాల్లో చాలా మంది తమ పిల్లలకు చేసే అలవాటు పుస్తకాలు చదవడం . 

పుస్తకం ఒక జీవితం , పుస్తకం ఒక మిత్రుడు ,పుస్తకం దారి చూపే దీపం ,
పుస్తకం మన ఊహలు అల్లుకునే చెట్టు కొమ్మ , పుస్తకం మన మనస్సుని 
కట్టుకొని పైకెగిరే గాలిపటం , పుస్తకం పక్క వాడి కష్టాన్ని మనకు తెలియచేసి 
గుండె బరువు దింపు కొనే అశ్రు కణం . నిజమా అంటే ..... 
నిజంగా నిజం . నాకు కాకపోతే ఇంకెవరికి తెలుస్తుంది దాని విలువ . 

ఆడపిల్ల ఇక బయటకి వెళ్ళకూడదు అనగానే మా కోసం ఒక కొత్త 
ప్రపంచం తెరుచుకుంటుంది . పెద్ద వాళ్ళ దగ్గర నుండి సహస్ర నామాలు ,
సుప్రభాతాలు ,రామాయణ భాగవతాలు , పినమ్మల దగ్గర నుండి 
వార ,మాస పత్రికలు ,ఆంద్ర భూమి ,జ్యోతి ,వనితా జ్యోతి ,విపుల ,చతుర 
కొంచెం పెళ్ళికి ముందు స్వాతి ఇంకొంచెం తరువాత నవ్య , ఇంకా 
ఫ్రెండ్స్ నుండి ప్రేమతో ఇచ్చి పుచ్చుకొనే నావల్స్ మల్లాది , యండమూరి ,
యద్దనపూడి ,మాదిరెడ్డి ..... లిస్టు వెళుతూనే ఉంటుంది లోకపు 
సంఘర్షణలో ,సంతోషాలో మొదటి పేజ్ తీసానంటే చివరి పేజ్ దాకా 
ఆపేది లేదు . అన్నం తింటూ కూడా చదవడమే . ఎలాగో మాకు అన్నం 
అమ్మే కలిపి ముద్దలు చేసి చేతులో పెడుతుంది . కూర ఏదైతే ఏమిటి 
అక్షరాలు నంజుకుంటే భలే రుచి . ఫ్రెండ్స్ పలకరింపు మొదటగా .... 
ఫలానా నావల్ చదివావా ?అని . పెళ్లి అయ్యి వెళ్ళే వాళ్ళు మాకు ఇచ్చి 
వెళ్ళే ప్రేమ కానుక ''లైబ్రరీ కార్డ్ '' . అదిగో అప్పటి అభిమాన రచయిత 
మల్లాది గారు . ఇప్పుడు వ్రాస్తే ఏదో ఒకటి చెప్పకుండా ఉండగలనా !
అందుకే ఇది వ్రాసాను . మల్లాది గారు మీరు నావల్స్ లో చెప్పిన 
విషయాలు మాకు తరువాత జీవితం లో చాలా ఉపయోగపడ్డాయి . 
మల్లాది గారు మిమ్మల్ని మేము మరచిపోము . థాంక్యు . 

బుద్ధుడు -బౌద్ధ ధర్మం

హమ్మయ్య ఏడాది చివరి రోజు కూడా వృధా అవకుండా మంచి 
పుస్తకం దొరికింది . ''బుద్ధుడు - బౌద్ధ ధర్మం '' 
డాక్టర్ పానుగోటి కృష్ణా రెడ్డి గారి రచన . ముందు మాట లో 
 బుద్ధుడి గూర్చి అరటిపండు వలిచి పెట్టినంత 
సులభంగా ఉంది అని చూసి ,
అదెలా సాధ్యం అనుకున్నాను . 
కాని చదివిన తరువాత నిజమే అనుకున్నాను . 
అంతంత భారీ విషయాలు చక్కగా అర్ధం
 అయ్యేట్లు వ్రాసారు . ఇంకా చాలా పుస్తకాలలో మేము 
చెప్పినదే నిజం అన్నట్లు  వ్రాస్తూ ఉంటారు . 
కాని దీనిలో ఎక్కడ అయినా కొంత వివాదం ఉంటె 
అక్కడ క్లియర్ గా దీని మీద వివాదం 
ఉంది అనే విషయం కూడా ఇచ్చి ఉన్నారు . 
బుద్ధుడి మహాభినిష్క్రమణ గూర్చి , 
చివరలో తిన్న బిక్ష గురించి , బిక్షలో మాంసాహారం తినడం 
గురించి ...... అక్కడ ఉన్న సందేహాన్ని కూడా బ్రాకెట్లో ఉంచారు . 
పాటకుల విజ్ఞతను గౌరవించినట్లు ఉంది . 

''ఆత్మో దీపో భావ '' ఏదీ గుడ్డిగా నమ్మకుండా ఎవరికి వారు 
సద్విచారణ తో తమ దీపాన్ని వెలిగించుకోవాలి . 
''మార్పు అనేది అంతిమ సత్యం '' ఒక మనిషి తోనే ఈ సమాజం 
నడవదు . ఎవరు గొప్ప అని కాక ఏది మంచిది అని ధ్యానం తో 
ఉంటూ నడవాలి . తనకు తెలిసింది చెపుతున్నాను అంటాడే కాని 
తనను దేవునిగా పూజించమని ఎక్కడా చెప్పడు . 
''తృష్ణ అన్ని బాధలకు మూలం ''
నాకు ఇది ఇష్టం ,అది ఇష్టం అనుకొంటూ ఉంటాము . కాని కొద్ది 
రోజులకు మనకు అర్ధం అవుతుంది అది యెంత తీర్చుకున్నా అంతం 
అయ్యేది కాదు . సంతృప్తి తోనే అది మాయం అయ్యేది అని . 
ఇలాంటి భావన రావాలి అంటే '' విపశ్యన '' ధ్యానం తోనే 
సాధ్యం . నిజంగా నేను ఈ ''శ్వాస మీద ధ్యాస ''ధ్యానం నేర్చుకున్నప్పుడు 
ఎంతో  ఆశ్చర్య పడ్డాను . ఎంత హాయిగా ఉంది . గురువులు లేరు . 
 ఎవరైనా ఇంట్లోనే హాయిగా చేసుకోవచ్చు .  మొదట కొంత ఆలోచనలు 
వచ్చినా ఇప్పుడు ఎంత హాయిగా ఆలోచన రహిత స్థితి కి సులభంగా 
వెళ్ళవచ్చు . 
ఇంకా కొన్ని బుద్ధుడి మాటలు 
''అప్రియమైన సత్యం చెప్పకూడదు అని చెపుతూ ఉంటారు కదా !
కాని బుద్ధుడు సత్యం అప్రియమైనదైనా సరే చెప్పాలి అంటాడు . 
సత్యం చెప్పకుండా తప్పులు సరిదిద్దడం సాధ్యం కాదు ''అంటారు . 
మామూలు మనుషులం కాసింత అటూ ఇటుగా ఉన్నా , 
ఎదుటి వారికి మంచి జరుగుతుంది అంటే కటువుగా ఉన్నా 
సత్యం చెప్పాల్సిందే . ఎవరు చెప్పినా ,ఏమి చేసినా అన్ని 
దారులు వెళ్ళాల్సింది సంఘం వైపే . సమాజ హితవు కు 
ఉపయోగపడని మనిషి జన్మ వృధా . అందుకే సంపాదించిన 
దానిలో కొంత ధర్మ కార్యాలకు ,అన్న దానానికి ఉపయోగించాలి . 
''సంఘం శరణం గచ్చామి '' 

మరి అన్నింటిలోకి ఇదే గొప్ప మతం అని ఎవరైనా చెపితే నమ్మకూడదు . 
ధ్యానం చేసుకుంటూ మనిషిగా ఏది మంచిదో అది చేయాలి . 
ఎందుకంటె ఏదో ఒక మతం లో ఇమిడినపుడు మన జ్ఞానానికి హద్దులు 
వచ్చేసినట్లే . హద్దులలో జ్ఞానం ఎప్పటికీ ఇమడదు . ఎన్నో 
విషయాలు చదివిన తరువాత , ఎన్నో అనుభవాలు పొందిన 
తరువాత మనిషికి తెలిసేది ఒక్కటే..... 
''తనకు తెలియనది ఎంతో  ఉందని ''

                    @@@@@@@@@@@@@ 
                

ఒక నేల కన్నీరు

ఒక నేల కన్నీరు ..... పాటక చేరి లో 
''సోన కాలువల పురా గాధ '' అనే 
పుస్తకం పై అభిప్రాయం ''సారంగ ఈ మాగజైన్ ''
లో చదవండి . 

(oka nela kanneeru link ikkada )

''స్వర్ణముఖీ సవ్వడులు'

పోయిన ఏడాది ఏప్రిల్ లో వచ్చిన పుస్తకం గూర్చి ఇప్పుడు 
ఎందుకు అనుకున్నాను ,కాని పుస్తకం లేబుల్ కింద నా 
బుక్ లేకపోవడం నాకే నచ్చలేదు . అందుకే వ్రాస్తున్నాను . 

(kinige lo book link ikkada )

కాసుల ఎండమావుల వెంట పరిగెత్తే లోకం లో ఒక్క క్షణం 

ఆగి హృదయాన్ని చిగుర్చి నిలవడం,చిన్ని చిరు మొగ్గగా 

మారి పువ్వుగా విరియడం .....పండుగ.మనిషి లోకం 

చేసుకోగల పండుగ.మరి అదే చెట్టు రెండో పూవును 

సృజించి లోకానికి అందిస్తే .......అనుభూతులను 

అక్షరాలుగా మలిస్తే .......అదే నా ''ఇంకో పువ్వు ''

''స్వర్ణముఖీ సవ్వడులు'' 

దీని గూర్చి రెండు మాటలు నా కలం రాల్చేముందు 

ఒక చిన్న విషయం 

విత్తనం లో నిద్రాణమైన చైతన్యం జీవపు తడి తగలగానే భూమి తల్లి 

గర్బాన్ని చీల్చుకొని మొలకెత్తుతుంది.అది సృష్టి నైజం .

నాలోని సాహిత్యపు విత్తనం ఎలా రూపొందిందో .......

గోరు ముద్దల కధలు ఊహల్లో చిత్రించుకున్నప్పుడో ,

నాన్న వేలు పట్టుకొని విశాలాంధ్ర వ్యాన్ లో కోడి పుంజు కధలు,

ఎలుగు భడవ కధలు ,బాల సాహిత్యం మొత్తం కళ్ళతో తడిమినపుడో,

అమ్మ నేర్పిన తత్వాలలోనో,అక్షరాలు గుర్తించడం రాగానే అమ్మమ్మ 

ఇంట్లో చదివిన రామకృష్ణ కధామృతాలు,వేదాంత బేరి,సుందరకాండ...

ఒకటేమిటి తెచ్చినవన్నీ చదివేయాలి అనే ఆత్రుత లోనో.....

ఎక్కడో ఈ విత్తనం రూపొంది ఉంటుంది.

హైస్కూల్  కి రాగానే కొంత వరకు పిల్లల కధలు గా మారి పుస్తకాలలో చేరింది.

ఇరవై ఏళ్ళ క్రితం ఉపాధ్యాయురాలిగా చేరినప్పటి నుండి కొంత చిగుర్చి 

పిల్లల నాటికలుగానో,పాటలుగానో ప్రశంస లు తెచ్చినా పూర్తి స్తాయి 

కవితా ప్రస్తానం 2006 తరువాతనే.అప్పుడు నేర్చుకున్న ధ్యానం నాలో 

నిగూఢమైన శక్తి ని వెలికి తెచ్చింది.సహోద్యోగి కవితల పుస్తకం చూసి 

నా చుట్టూ ఉండే విద్యార్ధులకు అర్ధం అయ్యే విధంగా చిన్న కవితలతో 

వెలికి తెచ్చినదే నా మొదటి పువ్వు ''జాబిలి తునకలు''

సూర్యోదయ అస్తమయ కొలతల మధ్య ఇమడని నా గురుకుల బడి 

బాధ్యతలలో వ్రాసిన కవితలు పదుల సంఖ్య లోనే.కాని వాటిలోనే 

బహుమతులు తెచ్చుకున్నవి,ప్రచురణ పొందినవి అయిన పది కవితలతో 

మిత్రులతో కలిసి ''దశ దిశలు''సంకలనంగా వెలువడినా అది పూర్తి స్తాయిలో  

నాదే కాదు.

అప్పుడు ఆకర్షించిన ప్రక్రియ నానీలు.నాలుగు పాదాలతో నాలుగు దిక్కులను 

తాకేంత భావ చిత్రం గీసే ప్రక్రియ నాకు యెంత గానో నచ్చి ......ఒక సంకలనం 

నా రెండో పూవుగా వికసించింది.ప్రతీ నానీ నా భావవర్ణాలను అద్దుకొని

సాహిత్య లోకంలో ఉదయించింది. అదే ''స్వర్ణముఖీ సవ్వడులు''

నా దారి ప్రక్కన సమకాలీనాలు,సార్వజనీనాలు అయిన ప్రతి విషయం 

నా నానీల కొలను లో ప్రతిఫలించింది.

ఊరును గుర్తు చేసుకుంటూ......''రెండు పాయల మధ్య మా ఊరు 

                                               అమ్మ దోసిట్లో ఎత్తుకున్నట్లు''

ఎవరికి ఉండదు కన్న ఊరి మీద  కలవరం.

                                            ''ఊరును వదిలేసినా 

                                            ఉత్తేజానికి ఊపిరి పోస్తూనే ఉంది ''

తాళి పడగానే ఆడ పిల్ల అయిపోయే వాళ్ళకే కాదు ,ఉద్యోగాల కోసం 

ఊరు వదిలే వాళ్లకు కూడా ........

ఇంకా ప్రపంచీకరణ నేపధ్యం లో ''ఆకుపచ్చని చీర కాలుతూ ఉంది 

                                             మాయదారి సెజ్ మంటల్లో''

ఆకలి కి బువ్వ  పెట్టె చేతులే  ఆకలి అని అడుక్కుంటూ ఉంటె  .....

                                              ''భూమి తడిసి పోయిందని చెప్పానా?

                                                అవును రైతు కన్నీళ్ళతో''

అక్షరాలూ పరుచుకుంటూ వెళితే పుస్తకం శూన్యంగా మారిపోతుంది.

నా తల్లి తండ్రులను,భగవంతుని తలుచుకుంటూ ఈ పుస్తకం ఒకరికి అంకితం....

''శశి అలివికాని పనులు పెట్టుకుంటావు''అని ఆర్ధిక బాధ్యతల మధ్య ప్రేమగా 

కసురుకుంటూ .....సందె వేళలో ఏకాంత దీపాన్ని వెలిగించగానే చల్లబడి

 ''నీ కోసం పదిహేను వేలు దాచాను పుస్తకం వేయించుకో ''

అనే ప్రేమ గుస గుస......''పర్లేదండి.అదేమీ అవసరం కాదు కదా''

అని నేను మనస్పూర్తిగా అన్నా 

''లేదు వేయించుకో.....''అని ఉత్సాహం ఇస్తూ 

''శశి ఈ లోకం లో నేను భరించలేనిది ఏమిటో తెలుసా ,

ఏ విషయం లో అయినా నువ్వు బాధపడి  ఉంటావేమో 

అనే ఊహా మాత్రపు ఆలోచనని ......నువ్వు ఎప్పుడూ నవ్వుతూ ఉండాలి''

అని ప్రతి అడుగులో చేయూత  నిచ్చే శ్రీవారికి అంకితం ఇస్తూ .....

              ''నాడు వేసినవి ఏడు అడుగులే 

                జీవితం తో గుణిస్తే లక్ష అడుగులు''

                

                 ''పూల తీగకు చెట్టు ఆసరా 

                  ఋణం తీర్చుకుంది పరిమళంతో''

ఈ అక్షర పరిమళం వారికే అంకితం.

మదిలోని కలకలం ఆగేంత వరకు ఏ రచయితా కలం ఆగదు.

అదిగో పచ్చటి గుబురుల మధ్య చిన్నగా ఊపిరి పోసుకుంటున్న 

నా ఇంకో పసి మొగ్గ.....బహుశా కధాసంకలనం కాబోలు .......

''రియాలిటీ చెక్ ''ఒక కొత్త వరవడి

కొత్త ఏడాది వచ్చి ఇన్ని రోజులు అయినా బ్లాగ్ చెట్టు 
 మీద వాలి ఇంత సాహిత్యపు గాలి పీల్చుకున్దాము అంటే 
ఎక్కడ .... అట్లాస్ వీపు మీద ప్రపంచ బరువు లాగా 
 ఫైనల్  వైపు పరుగులు వంటింట్లో ఉరుకులు . 

ఏదో ఇప్పుడు ''పూడూరి రాజి రెడ్డి ''గారి ''రియాలిటీ చెక్ ''
సమీక్ష పుణ్యమా అని ఇలా వచ్చాను . ఏదో పుస్తకాలు 
అనే లేబుల్ కింద కొన్ని వ్రాసుకుంటే రేపు వృద్ధాప్యం లో 
పుస్తకం లోని నెమలీకలు లాగా చూసుకొని మురిసి పోవచ్చని ఆశ . 

ఈయన మూడో పుస్తకం ఇది . బ్రతుకు దారి పక్కన మనం 
చూసే నిత్య జీవిత దృశ్యాలని తనదైన వచన శైలి లో 
తాత్వికతను జోడించి యాబై వారాలు ''సాక్షి ఫండే ''
కాలం లో వ్రాసిన ఖండిక ల సమాహారం ఈ పుస్తకం . 
అక్షర విలువను తెలుసుకొని చొరవగా ప్రచురించి 
సాహిత్య అభిరుచిని చాటుకున్న ''తెనాలి ప్రచురణ లు ''

వారు అభినందనీయులు . 

ఇంతకి ఈ పుస్తకం నేను చదవలేదు . కాని సాక్షి పాటకురాలిగా 
ఆ కలం వేలు పట్టుకొని ఆ ప్రదేశాలన్నీ చూసాను నేను . 

పుస్తకం కొందాము అంటే ఆ ''కినిగే . కాం ''వాళ్ళు 
''ఈ ప్రతి'' తప్ప మామూలు బుక్ అమ్మక పోతిరి . 
ఇక ఎమ్. ఓ చేసి తెప్పించుకొని ఆ యజ్ఞం అంతా 
పూర్తి చేసి చదవాలి . 
ఇప్పుడైతే ఊపిరి పీల్చుకొను కూడా కష్టం గా ఉంది . 
కాని మంచి పుస్తకం చదివిన మిత్రులు పరిచయం చేస్తే 
నేను ఆ పుస్తకాలు చదివినట్లు ఈ పుస్తకం కూడా కొందరికి 
పరిచయం చేయాలి (ముఖ్యంగా నా బ్లాగ్ వ్యుయర్స్ కి )
అనుకోని వ్రాస్తున్నాను . 

పదహారు ఏళ్ళ క్రితం అనుకోకుండా హైదరాబాద్ దగ్గర 
''చిల్కూరు బాలాజీ '' దగ్గరకు వెళ్ళాము . చాలా ప్రశాంతంగా 
ఉంది . పూజారి దగ్గర ఉండి అనీ వివరించి పదకుండు 
ప్రదక్షిణాలు చేసి కోరుకుంటే ఏ కోరిక అయినా 
తీరుతుంది . తీరితే నూట ఎనిమిది చేయాలి అని చెప్పారు . 
ఏదో జీవితం చాపను పరిచినా దిండు మీద ఆయన 
పడుకుంటే ఆ దండె మీద పడుకొని మధ్యలో ఒక పాపాయి ని 
బాబు ని వెచ్చగా  కాపాడుకొని మురిసిపోయే మధ్య తరగతి 
వాళ్ళం .... అప్పటికప్పుడు కోరికలు అంటే ఎలా వస్తాయి !
ఇంకేమి లేక ఈయన నేను ఎం . ఎస్ . సి పాస్ కావాలి అని 
కోరుకున్నాడు . ఏమి  కోరుకున్నాడో  తెలీక ఆయన 
కోరిక తీరాలి అని నేను మొక్కేసాము . 
తీరా పదేళ్ళ తరువాత మొక్కు తీర్చే అవకాశం వస్తే 
ఈయన నేను ఎలా తిరుగుథనొ అని బెంగపడిపోయాడు . 
అక్కడకు పోయి చూస్తే గుడి చుట్టూ అది జనాలు కాదు 
అప్పటి ప్రశాంతత ఎక్కడికి పోయిందో .... నన్ను తిరగలి మీద కూర్చున్న 
మినప గింజ లాగా వాళ్ళే నూటా ఎనిమిది తిప్పేసారు . 
అప్పుడు అనిపించింది ... .. ఈ రోజు ఉన్నట్లు రేపు ఏదీ 
ఉండటం లేదు ఈ రోజు పరిస్థితిని ,మనుషుల ఆలోచన లను 
రికార్డ్ చేయగలిగితే రేపటి వారికి ''కాలం వ్రాసిన డైరీ ''
గా ఇస్తే ఎవరైనా ఎంత బాగుంటుంది అని . అదిగో 
అప్పటి నా ఆలోచన ''రియాలిటీ చెక్ '' తీర్చింది . 

ఈ రోజు ''సాక్షి సాహిత్యం ''లో దానిపై సమీక్ష చూస్తే 
ఆ జ్ఞాపకాలు అన్నీ మళ్ళీ గుర్తుకు వచ్చాయి . 
వాన వెలిసినాక కొమ్మ ఊగితే పైన పడిన చిన్న నీటి 
బిందువులతో జ్ఞాపకాల ఉలికిపాటు . 

అన్నిటికంటే నచ్చినది బిచ్చగాళ్ళ గూర్చి వ్రాసినది ... 
''ఈ ముసలి తాబేలు ఎప్పటికి కొంత చిల్లర సంపాదిస్తుంది ''
అని రచయితే అక్షరాల స్పర్శ తో ఆమె ముసలి ముడతలు 
తాకించినపుదు కళ్ళ నీళ్ళు మనకు తెలీకుండానే జారిపోతాయి . 

''ఒకరి గెలుపు ఇంకోరి ఓటమి కాకుండా ఉంటె ఎంత 
బాగుండును ''అని ఇంకో రచన లో చేసే ఆకాంక్ష మనను 
ఆలోచన లో పడేస్తుంది . 

ప్రతి వారానికి ఒక స్థలం లో తిరిగి దానితో ముడిపడిన ఆలోచనని 
ద్రుష్టి కోణాన్ని తనదైన హాయి గొలిపే వచనం లో మన 
ముందు ఉంచుతారు రచయిత . 
ఇక పద ప్రయోగాలు అభిరుచి ఉన్న వాళ్లకి పాయసం తిన్నట్లే . 
బాగా నచ్చింది ఒకటి చెపుతాను . తన పత్రిక ఆఫీస్ లో 
పేపర్ సెట్టింగ్ నుండి ప్రింటింగ్ వరకు వ్రాసింది అది .... 
నిజంగా తన అక్షరాలతో అక్కడంత తిరిగిన నాకు ఆ ప్రింటింగ్ 
చూడాలి అనే కోరిక తీరనిది గానే మిగిలిపోయింది . 
ఇక్కడ వారిని వర్ణిస్తూ ఒక్కొక్కరికీ ''ఆత్మకధేడు అనుభవాలు ''
అంటారు రచయిత. జీవితాన్ని కొలవల గల ఒక చక్కని కొలత . 

పూల దండ గుచ్చిన వారికే ఇంకొకరు  అల్లిన పూదండ లోని 
సొగసు కష్టం తెలుస్తాయి .ఈ పుస్తకపు రుచి తెలుసుకోవాలంటే 
అదిగో ఆ ముఖ చిత్రం మీది చిన్ని బాబులాగా మన 
అస్తిత్వాలు అహాలు వదిలేసి నగ్నంగా దైవత్వాన్ని కప్పుకొని 
తలుపు చాటు నుండి తొంగి చూసే పిల్లాడంత కుతూహలంగా 
ఈ పుస్తకం లోకి తొంగి చూడాల్సిందే . సాహితీ ప్రియులకు 
చక్కని విందు అనడం లో సందేహం లేదు . 

''సాక్షి సాహిత్యం లోని సమీక్ష ఇక్కడ ''  
(reality check pai sameeksha 25/01/2014)

(kinge ebook koraku link ikkada )

పలక -పెన్సిల్ పై సారంగ లో నా నాలుగు మాటలు

పలక -పెన్సిల్ పై సారంగ లో నా నాలుగు మాటలు
పలక - పెన్సిల్ అనేది ''పూడూరి రాజిరెడ్డి ''గారి కొత్త
పుస్తకం . అప్పుడెప్పుడో ఇది చదివితే రివ్యు వ్రాస్తాను
అన్నాను కదా . ఇదిగో సారంగ ఈ -పత్రికలో వ్రాసాను
చదువుకోండి . ఎలాగో వచ్చారు కొంచెం స్వీట్ తిని వెళ్ళండి :)

(saranga lo palaka pensil pai na sameeksha ikkada)

నేను వెళ్లి శార్వరి గారి ''అచలమైన గురువు ''రమణ మహర్షి
బుక్ చదువుకోవాలి . శార్వరి గారు రమణ మహర్షి గారు
సూపర్ కాంబినేషన్ కదా !

ఆలు లేదు ... చూలు లేదు ...

 ఆలు లేదు ... చూలు లేదు ... కొడుకు పేరు సోమ లింగం :)

నిజమేనా ? ఇంకా పుస్తకమే బయటకు రాలేదు కదా దాని గూర్చి వ్రాస్తే 

ఇలాగే ఉంటుందా ?కాదు లెండి . ఆలు చూలు ఉన్నాయి . ఇదిగో క్రింద వ్రాసిన ముందు మాట 

సారంగ బుక్స్ వారి ముందు మాట  చూడండి .  

రాజిరెడ్డి అనే పేరు కేవలం వొకానొక పేరు కాదని ఇప్పుడు మనకు తెలుసు. ఆ సంతకం పైన కనిపించే వాక్యాలు కూడా సాదాసీదా వాక్యాలు కాదనీ తెలుసు. రాజిరెడ్డి చిరు వచన దరహాసాన్ని “పలక-పెన్సిల్” పుస్తక రూపంలో సారంగ బుక్స్ ద్వారా త్వరలో మీకు అందించబోతున్నామని తెలియజేయడానికి సంతోషిస్తున్నాం. ఈ ఏడాది సారంగబుక్స్ ద్వారా వెలువడుతున్న తొలి పుస్తకం “పలక-పెన్సిల్”. ఆ పుస్తకం నించి వొక మెచ్చుతునక మీ కోసం!

(saranga ku link ikkada )

ఎవురబ్బ ఈ రాజి రెడ్డి
నేను మాత్రం చూసానా ఏమిటి
సాహిత్యాభిమానిని కాబట్టి అక్షర రూప
పరిచయం .

ఏమి ఉంటుంది ఈ పుస్తకం లో ?
లింక్ లోకి వెళ్లి చూస్తే అర్ధం అవుతుంది .
కాని ఒక్క రెండు మాటలు కాదు లెండి కొన్ని
కబుర్లు చెపుతాను . అప్పుడు మీకు ఈ
పుస్తకం చదవాలి అనిపిస్తుంది .

మళ్ళా ఇంకో సారి అదే ప్రశ్న .... ఎవురబ్బ ఈ పూడూరి రాజిరెడ్డి ?

ఒక సారి రెండేళ్ళ క్రితం ఫండే లో పదాలు పెదాలు చదువుతూ ఉన్నాను .
ఎందుకో ఒక వాక్యం దగ్గర మనసు ఆగిపోయింది . అది ఒక తండ్రి ,బాబు
ఆడుకొనే దాగుడు మూతలు . అది ఆట కంటిన్యు చేయమని చెబుతున్నాయి 
వాడి కళ్ళు నవ్వుతూ .... మరి ఆ స్పృహ నాకెందుకు లేదు అని . 
ఉలిక్కి పడ్డాను . నాకు ఇలాంటి భావాలే వస్తూ ఉంటాయి .
ఎలాగు అభినందించడం లో నేను చాలా హుషారు కాబట్టి బాగుందని మెయిల్
చేసాను . పాపం ఆయన మొహమాటానికి మీకు ఇంట్రస్ట్ ఉంటె నా బ్లాగ్
చూడండి అని లింక్ ఇచ్చారు .
అసలు బ్లాగ్ అంటే తెలీని నాకు అప్పుడు ఒక కొత్త  ప్రపంచం
ఇది మంచి మాధ్యమం నా రచనా సామర్ధ్యాన్ని పెంచుకోవడానికి అని అనుకోని
బ్లాగ్ మొదలు పెట్టి దేవుని దయ వలన ఇప్పటి దాకా అందరు మంచి ఫ్రెండ్స్
సహాయంతో కొనసాగిస్తున్నాను . పాపం ఆయనకు తెలీకుండానే నాకు
లింక్ ఇచ్చి సహాయం చేసారు కదా అందుకు థాంక్స్ కూడా వ్రాసేశాను .

ఒక పాటకురాలిగా నాకు రచయిత తో పని లేదు . నన్ను హంట్ చేసే అక్షరం ,
దానిని ప్రయోగించడం లోని సొగసు ,చివరలో మనసులో ఉప్పొంగే మంచి
భావన ఇవి కావాలి .
అసలు ఈయన ఏమి వ్రాస్తాడు ? మా బాబు అడుగుతుంటాడు.... ఎముందమ్మ
దీనిలో అన్ని సార్లు చదువుతావు ,నిజమే ఏమి ఉండదు , ఉత్తినే మనం
రోజు చూసేవే వ్రాస్తాడు . ఏముంది లే  దీనిలో అనుకొనే లోపు ఏదో ఎమోషన్
మనలను ఎక్కడో టచ్ చేస్తుంది . రచయిత  మహా మాంత్రికుడు సుమండీ . 
ఆయన హిడన్ అజండా లు ''పలక -పెన్సిల్ '' లో దులిపాడంట .
మనకెందుకు అనుకుంటాము . మన లోవి గట్టిగా దాచుకుంటాము ఎక్కడ
జారి అందరు ముందు పడిపోతాయో అని .... ఆయన కొబ్బరి బొండం త్రాగితే
మనకేమి లేకుంటే మనకేమి అనుకుంటాము . ఇంతలో ఎక్కడో మన త్రాగలేక పోయిన
కోక్  గుర్తుకు వచ్చేస్తుంది . ఆయన దస్తి కుడి జేబులో పెట్టుకుంటే ఏమిటి ?
ఎడమ జేబులో పెటుకుంటే ఏమిటి అనుకుంటాము ... ఇంతలో మనం
జంకుగా ఎదుర్కున్న ఫైవ్ స్టార్ హోటల్ గుర్తుకు వస్తుంది .
ఎత గట్టిగా పట్టుకున్నా ఇద్దో ఈయన గమ్మత్తు ముందు మొత్తంగా
మన హిడన్ అజెండా బయట పెట్టీ పెట్టక నువ్వు నా తమ్ముడివి ,ఫ్రెండ్ వి
ఇలాగా అక్షర రూపం లో ఆయనను ఏదో ఒక రూపం లో హత్తుకుంటాం
ఆత్మీయంగా ...... ఇంతా మాయ చేసి అమ్మకు నోరు చూపించిన కృష్ణుడి
మల్లె మన నోరు తెరిపించి ,స్వేచ్చగా బ్రతకడం ఈ జన్మ లో నాకు రాదు
అని మన పుస్తకాల రాక్ లో ఆత్మీయంగా బందీ అయిపోతాడు . 

నిజానికి నాకైతే ఈయన వ్రాసిన వాటి లో ఓన్ చేసుకొనేవి ఏమి లేవు ...
నేను మహా ధైర్యం ..... అదిగో ఒక్కటి ఉంది . రోజు పక్కేనే వెళ్ళే
ఇంట్లో మామిడి చెట్టు కూడా చూడక పోవడం .
ఇలాటివి నాకు స్కూల్ లో బొలెడు . మీటింగ్ లో నేను అక్కడే ఉన్నా
సమన్స్కురాలినై ఉండనని మా స్తాఫ్ఫ్ మొత్తానికి తెలుసు .
అందుకే ప్రిన్స్ పాల్ పది సార్లు అయినా అడుగుతుంది ''శశి ఏమి చెప్పానో
చెప్పు '' అని ...... సరే ఈయన వ్రాసేవన్నీ బాగుంటాయా అంటే ......
కొన్ని ఉంటాయి అండి  మా వరకు బియ్యం మధ్యలో నల్ల రాళ్ళు లాగా ....
ఎలా ఉంటాయి అంటే
''నాకు మాత్రమె నూట రెండు మంది ప్రియురాళ్ళ మినహాయింపు ఉండొద్దా ''
అంటాడు . దీనిని ఇప్పుడు మేమెలా జీర్ణించుకోవాలి . కూసింత తల తిప్పెసుకొని
నవ్వుకుంటూ సగటు భారతీయ స్త్రీల గౌరవం పెంచేస్తూ ముందుకు వెళ్లిపోతాము .

అది ఎలాగా అంటే ..... ఇప్పుడు స్కూల్ లో పిల్లలు ఫంక్షన్స్ అప్పుడు డ్యాన్స్
వేస్తుంటారు . మేము ఉంటె సినిమా పాటలు ఎంజాయ్ చేయ లెరు.
ఈలలు ,చప్పట్లు ఉంటేనే వాళ్లకు తృప్తి . చేసేదేముంది వాళ్ళ వయసు ముచ్చట
గౌరవించి మేము నవ్వుకుంటూ తల తిప్పేసి దూరంగా వెళ్లి పోతాము .
అలాగని శృతి మించితే భాద్యత తో కూడిన మా దండం దశ గుణం భవేత్
ఎలాగు ఉంటుందని వాళ్లకు కూడా తెలుసు .
మనలో మాట ఈయన గురు కులం లో నా స్టూడెంట్ అయ్యుంటే ఎంత బాగుండును .
మరి నా శిష్యులలో ఎన్నో ఉద్యోగాల  వారు ఉన్నారు కాని రచయితలు లేరు :(
 నిజంగా నా శిష్యుడు అయి ఉంటె బాగా వ్రాసినా ఆయుక్షీణ  భయంతో పొగడకుండా
''బడుద్దాయి ఏమిటా ఇంగ్లీష్ తెలుగు కలిపిన బాషా సంకరం '' అని తృప్తిగా
తిట్టి ఉండేదాన్ని . టీచర్స్ నాలుక కరుకు అయినా..... ఆశీస్సు నిష్కల్మషం
సుమండీ .
ఇంకో మాట ఈయనకి ఈయన వ్రాసినవి మనం చదువుతుంటే మన ముఖ కవళికలు
ఎలా ఉన్నాయో చూడాలి అని ఉందంట .... నాకైతే నేను పై వాక్యం లో
వ్రాసిన తిట్టు ని ఆయన చదివితే ఎలా ఉంటాడో చూడాలి అని ఉంది ....
ఎందుకంటె మంచులో తడిసి వెచ్చని సూర్య కిరణాలకి విప్పుకొనే
తెల్లని నంది వర్ధనం ఎలా ఉంటుందో ..... హృదయానికి ఆత్మీయత తగిలినపుడు
పెదాలపై విరిసే నవ్వు ఇంకా స్వచ్చంగా ఉంటుంది . ఏమంటారు ?

ఖచ్చితంగా ఆ బుక్ నా చేతులు తాకగానే దాని సమీక్ష నా బ్లాగ్ లో రేకులు
విప్పుతుంది చూడండి :) 

ఒక మంచి నాన్న

శైలబాల రచించిన నాన్న నావల్ గూర్చి నా సమీక్ష 

(శైలబాల బ్లాగ్ లింక్ ఇక్కడ )

ఒక తరం వారు ఇంకో తరాన్ని ఆశీర్వదిస్తూ ఇవ్వవలసిన బహుమతి. 

" నాన్న " నవల

'నాన్న''పుస్తకం చేతిలోకి తీసుకోగానే అక్షరాల సువాసన ,బహుశా ఆత్మీయత 
కలిపినందువలన ఏమో !!

కళ్ళు పుస్తక తలుపు మీటగానే చిన్నారి పాప నవ్వుతూ 
''తల్లి భూదేవి తండ్రి ఆకాశం 

మధ్య విరిసిన హరివిల్లులు బిడ్డలు'' అని చెపుతూ రండి మా నాన్నను 
పరిచయం చేస్తాను అని ప్రేమగా పిలుస్తూ ఉంటుంది.

ఇది ఒక  నాన్న ఆడ పిల్ల తండ్రిగా ఉప్పొంగిన ఆనందం,
అనుబంధాల ఘర్షణ లో అంతరంగం లో జరిగే మార్పులు 

ఒక మంచి సమాజ స్తాపన వైపు వారు నడిచే తీరు శైల బాల గారి కలం లో
అద్భుతంగా జాలు వారింది.

పుస్తకం లోకి వెళితే చంద్రశేఖరం వారి భార్య ,వారికి ముగ్గురు పిల్లలు .

చివరిదైన అమ్ము పెంపకం లో తన తోడు లో తాను అనుభవించిన ఆనందం గూర్చి 

చంద్ర శేఖర్ గారు మనతో పంచుకుంటారు.ఆయన ఒక మంచి నాన్న .....ఎంత అంటే ....

ఉయ్యాలలో పాప ''ఊహూ''అన్నా పాప ఆజ్ఞగా పాటించే అంత 

పాపకు అక్షరాభ్యాసం తో పాటు ఆమెకు నచ్చిన పేరు అడిగి ఆ రోజే పెట్టె అంత 

పాప ముగ్గు వేయమంది అని పాప కోసం గొబ్బెమ్మలు కూడా దొంగలించుకొని
 వచ్చే అంత 

చివరికి తన పాప లాగా అల్లుడు కూడా చాక్లెట్ తింటాడా తినడా 
అని పెళ్ళికి ముందే పరీక్షించే అంత .....

మంచి అమ్మ ,మంచి నాన్న ,మంచి అమ్ము,మంచి అల్లుడు ,మంచి తాతయ్య,మంచి నానమ్మ 

మరి కధ  ఏముంది?

అదే మరి తెలుసుకోవాల్సినది.

కూతురు  కడుపుతో ఉందని చూద్దాము అని వచ్చిన ఇంత మంచి నాన్నకి అల్లుడు గొంతు
బయటే వినపడుతుంది ''మీ నాన్న ప్రవర్తన నాకు నచ్చదు''అని,

చిన్నపోయిన గుండె తట్టుకోగలదా?

చంద్రశేఖరం ఆ విషయాన్ని తేలికగా వదలదు 

ఎందుకు తన ప్రవర్తన అల్లుడికి నచ్చదో తెలుసుకుంటాడు 

పశ్చాత్తాపం తో తన ప్రవర్తన సరిదిద్దుకోవడమే ఈ కధ .

కాదు బంధాలను  ఇంకో సారి తడిమి చూసుకోమని మనకు ఇచ్చే 
ఒక కోయిల కూత.కమ్మని మనసు పాడే రాగం.

మంచి వాక్యాలు బోల్డ్ చేయడం ,చివరి పేజ్ లో సీతా రాములు చిత్రం 

రచయిత్రి అభిరుచిని తెలియ చేయడమే కాక మనను  ఆత్మీయంగా పలకరిస్తాయి.

ఇంకా అమ్ము (పేరు గీతాంజలి) అమ్మా నాన్న ల సహాయంతో తన వ్యక్తిత్వాన్ని తీర్చిదిద్దు 

కోవడమే కాక తన చుట్టూ ఉండే వారిని చేరదీయడం మనిషిగా మన బాధ్యత ను గుర్తు చేస్తాయి.

మరీ ముఖ్యంగా వాళ్ళు ''బృందావనం''అనే సామాజిక కార్యక్రమాన్ని 
పరిచయం చేసేటపుడు అందరికి తమ అనుభవాలను చెప్పడం .....
ఒక్క క్షణం రచయిత్రి ఆత్మ అక్షరాలుగా  కనిపించి 

మన హృదయం తడి అవుతుంది.

కొని మంచి వాక్యాలు 

''భర్త దగ్గర భార్యకి ''నిశ్చింత''ఉండాలిరా ఆందోళన కాదు.....

కాని భర్తే ఒక సమస్యగా మారి ఆ పిల్ల ఆందోళన చెందకూడదు''

''చిరుగాలి ఆటలాడుతూ ధడెల్మని తలుపులు తోసుకొని వచ్చినంత 
స్వేచ్చగా ఇంట్లోకి రాగలిగేతేనే ......అది చక్కటి అనుబంధం అవుతుంది''

''నాన్నా  ఒక వ్యక్తి ని ఇష్టపడినపుడు,ప్రేమించినపుడు తర్వాతా
ఎన్ని ఇష్టం లేని కారణాలు బయటపడినా ఆ ఇష్టం  లో ఆ ప్రేమలో 
మార్పు రాకూడదు.ఆ ఇష్టం ,ప్రేమ ఇంకా పెరగాలట.

ఆప్పుడే ఆ ఇష్టం లేని కారణాలను మార్చుకొనే తాపత్రయం,
భరించే ఓర్పు పుట్టుకోస్తాయట.''

''నీ భార్య చెప్పేది పూర్తిగా విను ...

తనను పూర్తిగా గౌరవించు ....

తనను ఒక ప్రత్యేకమైన వ్యక్తిగా చూడు 

సంపూర్ణంగా ప్రేమించు....''

మనసుని హత్తుకొనే మల్లెల సువాసన లా ఎన్ని మంచి వాక్యాల కూర్పు.

ప్రపంచీకరణ నేపధ్యం లో పరుగులే అవసరం,స్వార్ధమే ముఖ్యం అనుకునే ప్రపంచం లో
బంధాల విలువులు తెలిసిన వారు చదివి తప్పక దాచుకోవాల్సిన పుస్తకం.

ఒక తరం వారు ఇంకో తరాన్ని ఆశీర్వదిస్తూ ఇవ్వవలసిన బహుమతి.

''నాన్న''పుస్తకం శైల బాల జీవితం లో ఒక చక్కని జ్ఞాపకం.

తన్నీరు శశికళ 

http://itissasiworld.blogspot.in

''రెప్పల వంతెన''కవితా సంకలనం సమీక్ష

కవి ''కెక్యుబ్ వర్మ గారి '' ''రెప్పల వంతెన''
కవితా సంకలనం పై నా సమీక్ష ఈ రోజు
పుస్తకం .నెట్ లో......
''కినిగే'' లో ఈ కాపీ కూడా దొరుకుతుంది

(రెప్పల వంతెన సమీక్ష పుస్తకం.నెట్ లో లింక్ ఇక్కడ )

వ్యాసకర్త: శశికళ వాయుగుండ్ల
*******
కళ్ళు తెరిస్తే లౌకికం ….కళ్ళు మూస్తే కనిపించేది అలౌకికం…మరి రెండింటి మధ్య వంతెన మన కనురెప్పలు. లౌకిక, అలౌకిక భావనా ప్రపంచాల మధ్య అక్షరాలకు
భావాలు అద్ది కూర్చిన వంతెన ఈ ”రెప్పల వంతెన” కవితా సంకలనం. కను రెప్పల వంతెన కింద…..ఉబికే కన్నీళ్ళను ఉగ్గ బట్టుకొని నెత్తురు చిమ్మిన ఎదను ప్రమిదను చేసి ఇలా మిగిలా….ఒక్కో అక్షరం వెనుక దాగిన ఆర్తి మనను ఎంతో సేపు గాడ సుషుప్తిలోనికి తీసుకు వెళ్లి ఒంటరిని చేస్తుంది.

కవిగానే కాక ఇక్కడ ”కెక్యూబ్ వర్మ”గారు (k.k.kumaara varma) మట్టి తనాన్ని,మనిషి తనాన్ని హత్తుకొని వేదనాభరిత రేఖల మధ్య విశ్రమించని మునిలా గోచరిస్తాడు.

”విధ్వంసం ఆవలి వైపు”లో// ఇపుడు నేను కవిత్వం రాయలేక పోతున్నాను…// అంటూ గుండెలపై టన్నుల కొద్దీ ఆలోచనల మనలోకి మోసుకోస్తారు.

”//మనసులోని వ్యాకులతను పారదోలి
వెలుగును నింపే వాక్యం కోసం ….
ఎద నిండా నిబ్బరం నింపే స్నేహితుని లాంటి వాక్యం కోసం //
ఇలాంటి వాక్యం కోసం ఎదురుచూసే వాళ్ళ నిరీక్షణ ఫలించేలా ఉంటుంది అక్షరాల గమనం.వాక్యాల కూర్పు.

నాన్న ను కోల్పోయిన శూన్యమే తన అక్షరాలలో ప్రతిఫలించే వేదన అని ముందుమాటలో వ్రాసి ఉన్నారు. ఇంకా తన తండ్రి ధారపోసిన తపోఫలితమే ఈ అక్షర ప్రవాహం అని వ్రాసిఉన్నారు.

”ఎప్పుడైనా నిన్ను నీవు వడిసెల రాయిని చేసి విసిరి చూసావా? అంటూ ఎప్పుడైనా నిన్ను నీవు డప్పుపై చర్మంగా మార్చి నకజనకరి నం దరువై చూసావా?అంటూ తన విరసం నేపధ్యాన్ని మన ముందు పరిచి రోషాన్నిరగిలిస్తారు? శ్రీకాకుళం జిల్లా విరసం కన్వీనర్ గా బాధ్యతలతో ముందుకు వెళుతున్నపుడు తనకు ఆత్మీయతను పంచి ముందుకు నడిపిన
మిత్రులను కోల్పోయిన వ్యధ అక్షరాలలో అంతర్లీనంగా తొంగి చూస్తుంది.

వస్తు వైవిధ్యం ఇంకా ఉంటె బాగుంటుందేమో అనిపించినా కొన్ని వాక్య నిర్మాణాలు మళ్ళీ మళ్ళీ కనిపించినా…. భావాల లోతు, కవితా ప్రవాహపు వడి మనను చాలా సేపు
నిశ్శబ్దపు దారుల వెంట నడిపిస్తాయి. అప్సర్ గారి మాటల్లో”అటూ ఇటూ ఊపిరాడనివ్వని రెండు పరస్పర భిన్నమైన పరిస్టితుల మధ్య వంతెన కట్టుకొని దాని మీద సహనంగా,నిబ్బరంగా నిలబడి కాలం తో కరచాలనం చేసే స్నేహపూరితమైన దృష్టి వర్మ సొంతం” వర్ధమాన కవులకు,సాహిత్య ప్రియులు సొంతం చేసుకోగల మంచి పుస్తకం.

వెల:80/-
ప్రతులకు :k.k.kumara varma
H.No.11-3-11,near K.P.M.High school
parvathipuram-535501
Vizianagaram dist
ph:9493436277
books available at WWW.kinige.com

పప్పులు బెల్లాలు ఒక మంచి పుస్తకం

పోయిన సంవత్సరం చదివిన వాటిలో ఒక మంచి పుస్తకం 
''పప్పులు బెల్లాలు''.ఇది ''కోట పురుషోత్తం ''గారు పిల్లలకు 
స్పూర్తి కలిగించే వివిధ పద్యాలు,కధలు,వ్యాసాలూ తో 
నిండిన ఒక సేకరణ .ముందుగా పురుషోత్తం గారిని ఒక 
మంచి ప్రయత్నం చేసినందుకు అభినందిస్తున్నాను.
వారే ''రెండో ప్రపంచ రచయితల సదస్సు''సావనీర్ లో నా పేరు  
చూసి ఫోన్ చేసి ''అమ్మా  నేను పప్పులు బెల్లాలు అనే పుస్తకం లక్ష కాపీలు 
ప్రచురించి టీచర్ లకు,పిల్లల కు ఉచితంగా పంచుతున్నాను.చదవండి.
చదివించండి.పిల్లలను స్పూర్తితో నడిపించండి''అని చెప్పి 
ఇరవై పుస్తకాలు పంపారు.

ఏందబ్బా ఈయన నాకన్నా పిచ్చోడి లాగా 
ఉన్నాడు ఉత్తినే డబ్బులు ''పప్పులు బెల్లాలు''గా పంచేస్తున్నాడు అనుకున్న 
మాట నిజం.కాని ఆ పుస్తకం చదివిన తరువాత ఆయనకు ఫోన్ చేసి 
అభినందనలు తెలపకుండా ఉండలేక పోయాను.పిల్లలకు ఈ బుక్ 
ఇచ్చి వదిలేస్తే చాలు ఇక ఏ దారిలో వెళ్ళాలో వల్లే నిర్ణయించుకుంటారు.
(నిజం ...నా తలగడ దగ్గర పడేసి ఉన్న పుస్తకం మా పాప వదలకుండా 
మొత్తం చదివి దానిలో మాటలు రిపీట్ చేస్తే నేను చాలా సంతోషించాను)
ఆయన నాకు ఇవి అమ్మటం లేదు అని చెప్పారు కాని లోపల పేజెస్ 
లో వంద రూపాయులు,విశాలాంద్ర,నవోదయాలలో దొరుకును అని ఉంది.
ముఖ చిత్రం ,ఆయన ముందు మాట చూడండి.సమీక్ష మళ్ళా వ్రాస్తాను 

చదివారు కదా.తన తండ్రి ఇచ్చిన డబ్బు సార్ధకత చేయాలని,ఆ తండ్రి పేరు 
నిలపాలి అని ఒక కొడుకు చేసిన మంచి ప్రయత్నం.(మీరు కూడా ఎవరైనా 
రచయితలూ పుస్తకానికి సహాయం చేయమంటే చేసి మీ నాన్న గారి పేరు 
వేయండి.ఆచంద్ర తారార్కం ఆ పుస్తకం ఉన్నంతవరకు వాళ్ళు నిలిచిపోతారు)

సరే దీనిలో విషయ సూచిక ఏమి లేదు.వరుసగా ఏమి ఉన్నాయో చెపుతాను.
చిన్న నీతి పద్యాలు పురాణాలలోవి ఇచ్చినవి , పై మెరుగులు చూసి 
స్నేహం చేయకూడదు అని ,చిన్న దానం అయినా కాపాడుతుంది 
అని చిన్న కధలతో పిల్లలకు పద్యాభిలాష కలిగే విదంగా వివరించారు.

ఏదైనా శ్రద్ధ తో చేస్తే ,ఏకాగ్రతతో చేస్తే గెలుపు పొందగలరు.ఇంకా గణితం లో 
''పై''ఎలా కనుగొన్నారో మీరు ప్రయోగాలు చేసి తెలుసుకుంటే మర్చిపోరు.
అని వాళ్ళు ఎలా చదివితే బాగుంటుందో చక్కగా పికాసో,బాపు,నార్కే ఇలాగా 
ఉదాహరణలు చూపుతూ ఇచ్చారు.
అమ్మ అంటే గొప్పది అని ''కవి వర ప్రసాద్ రెడ్డి గారు''ఇంకా ఇతరులు 
ఎలా చెప్పారో పిల్లలు మనసు హత్తుకోనేలాగా చెప్పారు.

ఇంకా కధల మీద అభిరుచి పెంచేటట్లు...వాళ్ళు సొంతంగా కధలు 
వ్రాయ వచ్చు అని చూపేదానికి ఖదీర్ బాబు గారి ''మా అమ్మ 
పూల వ్యాపారం''అనే కధను ఇచ్చి మీరు కూడా ఇలాగ సొంత 
యాస లో వ్రాయండి అని కిటుకులు చెప్పారు.(మా పాప ఈ 
కధ మొత్తం చదివేసి అమ్మ మనం కూడా సన్న జాజుల చెట్టు 
వేసుకున్దాము అనింది.పేదరికం లో కూడా యెంత చక్కగా గౌరవం 
కాపాడుకున్నారో)

ఇంకా ''శ్రీ శ్రీ ''గారి శైశవ గీతిని,ఓల్గా రచనలను ,సుధామూర్తి 
గారు తనకు ఇష్టమైన పుస్తక పటనం అందరికి అందాలి అని 
లైబ్రరీలు ఎలా పెట్టారో చిన్న కధ  లాగా భలే ఇచ్చారు.

ఇంకా ''ఔరంగజేబు తన గురువుకు వ్రాసిన లేఖ''
''అబ్రహం లింకన్ తన కుమారుని గురువుకు వ్రాసిన లేఖ''
టీచర్స్ చదువే కాకుండా వారి వ్యక్తిత్వాలు కూడా 
తీర్చిదిద్దాల్సిన బాధ్యత ను గుర్తుచేస్తున్నాయి.

ఇక చివరిలో ''తెలుగు  పద్యము...మా నాన్న ''అని ఇచ్చిన 
కొన్ని పేజీలు చూస్తె వాళ్ళ నాన్న గారి మీద మనకు ఎంతో 
గౌరవభావం పెరిగిపోతుంది.
ఒక్క మాటలో చెప్పాలి అంటే 

''మీకు ఈ పుస్తకం దొరికితే అదృష్టం.మీ పిల్లలకు ఇచ్చేసి 
చదువుకోమని చెప్పండి.తెలుగు మీద,విలువల మీద,
పెట్టుకోవాల్సిన లక్ష్యాల మీద,అమ్మ నాన్నల మీద వారికి 
యెంత గౌరవం వస్తుందో మీరే స్వయంగా చూస్తారు''

ఇది రచయితగా,ఉపాధ్యాయురాలిగా,అమ్మగా నేను 
అనుభవించి చెపుతున్న మాట.
పురుషోత్తం గారు మీరు ఇంకా ఇంకా ఎన్నో మంచి పుస్తకాలు 
వెలువరించి అందరి హృదయాలలో నిలిచిపోవాలి.

అభౌతిక స్వరం.....ఒక చక్కటి పుస్తకం

''అభౌతిక స్వరం''పోయిన సంవత్సరం లో 
నేను చదివిన ఒక మంచి పుస్తకం.
పెద్ద వాళ్ళల జీవితం లో ఒక సంక్లిష్ట క్షణాన్ని 
తీసుకొని దానిని వారు ఎలా ఎదుర్కున్నారో
లేదా ఆలోచించారో రచయిత ''మాధవ్ .శింగరాజు''
గారు చాలా చక్కగా వ్రాశారు.కవితా శైలిలో సాగిన 
వచనం పుస్తక ప్రియుల ఆనందాన్ని రెట్టింపు చేస్తుంది 
అందు  లో సందేహమే లేదు.
పుస్తకాలు ''కినిగే''లో మరియు ''నవోదయ''లో లభ్యం.
ఎవరికైనా దొరకక పొతే ఈ నంబర్ కు ఫోన్ చేసుకోవచ్చు.
9848618166
''అభౌతిక స్వరం''పేరు వినగానే 

దేని గూర్చి అని కొంత

కుతూహలం.దానిని తీరుస్తూ 

ముందు మాటలోనే వ్రాశారు 

రచయిత''అభౌతిక స్వరం 

అంటే మంద్ర స్వరం.జీవిత 

అనుభవాలతో రాటు దేలిన 

మనిషి భౌతికంగా మెత్తబడినా 

అభౌతికంగా అది పదును 

తేలిన మృదు బాషణ''

మాధవ్.శింగరాజు గారు 

సాక్షి ఫ్యామిలీ లో వ్రాసిన ''నేను''

శీర్షిక లో వచ్చిన గొప్పవాళ్ళ

స్వగతాలు ఇవి.ఇప్పుడు ఈయన 

సాక్షి లో పనిచేస్తున్నారు.

అంతకు ముందు వార్తలో పని చేస్తూ 

వెనుక పేజ్ ''ఛాయాచిత్రాలు''

మాధవ్ గారిగా అందరికి పరిచితుడు.

ఇది మొదటి పుస్తకం.

గొప్పవారి జీవితం లో 

ఏదో ఒక సందర్భం లో వారి 

అంతరంగ ఘర్షణ స్వరంగా మార్చి

అక్షరాలుగా కూర్చి మన ముందు 

ఉంచారు రచయిత.

''వచనం కవిత గా మారితే 

స్వరం గా మారి అలరిస్తుంది''

ఒకరు ఇద్దరు కాదు 

యాబై మంది పైగా  ప్రసిద్ధుల 

ఆలోచనలోతుల్లోకి మనలను 

అలవోకగా తీసుకొని వెళ్లి ...అరె 

అంతలోనే అయిపోయిందా?

అనుకునేలా చేస్తారు రచయిత.

(ఇంకా చాలా మందివి 

పుస్తక కూర్పులో లేవు.

కాగితపు కొరత కాబోలు)

పేరుకు మంద్ర స్వరమే 

కాని వ్యక్తుల స్వభావాలను బట్టి 

వారి అంతరంగాలు 

మధ్య స్తాయిలో,హెచ్చు స్తాయిలో 

భావాలను మన ముందు పరుస్తాయి.

ఒక వైపు ఐన్ స్టీన్ మనతో గాంధీజీ 

ఆత్మను పంచుకుంటూ ఉంటె 

ఇంకో వైపు అలగ్జాండర్ ''ఖండాలు 

సరిపోని వాడైనా పుడమి కడుపులో 

ఇమిడిపోవాల్సిందే''అని తాత్వికతను 

పులుముతుంటాడు.

శాలింగర్ ఏకాంతపు కారణం 

అక్షరాలకు అద్దుతూ ''ఏమి చెప్పమంటారు?

నేను ఇష్టపడే వ్యక్తుల పై మొహం మొత్తి

జబ్బున పడ్డాను.నేను గౌరవించే వ్యక్తీ కావాలి ''

అని అన్వేషణ లో ఉంటాడు.

అంతలోనే నోస్ట్రాడామస్ తనను గౌరవించె వాళ్ళతో 

''దివ్యదృష్టి దైవ సృష్టి ....

ఆయన ఊదే ఒక బూరను మాత్రమె ''

అని తన ఉనికికి ఊపిరి ఎవరో చూపుతుంటాడు.

జ్యోతీబా పూలే,జేమ్స్ కుక్,జెరో నీమో,రమణ మహర్షి,

ఆర్.కే.లక్ష్మణ్ ,సలీం ఆలి ఎంతో 

మంది ఆలోచనలు మాధవ్ గారి 

అక్షరాలతో కొత్త సొబగులు దిద్దుకొని 

కాగితం పై అలవోకగా వొదిగి 

మన దృష్టి ని పుస్తకం నుండి మరలనీవు.

అసలు ఆడవాళ్ళ అంతరంగాలు 

మగ వాళ్ళు ఎలా వ్రాయగలరు 

అనే సంశయం వస్తే 

''బిల్లీ జాన్ కింగ్''టెన్నీస్ లో 

బాబి రిగ్స్ ని ఓడించినపుడు 

తన భుజం తట్టిన తీరు.....

''కల్పనా చావ్లా''కళ్ళలో ఆత్మా విశ్వాసం 

అక్షరాలుగా రగిలినపుడు....

చూపు తగ్గినా ''మేడం క్యూరీ ''

విజయం నుండి చూపు తిప్పనపుడూ...

అంతరంగావిష్కారానికి కావాల్సింది 

అంతర్నేత్రం తప్ప జెండర్ కాదు 

అనిపిస్తుంది. 

చక్కటి శైలి,భావ పుష్ఠి 

మనలను అలరిస్తాయి.పుస్తక ప్రియులు 

తప్పక చదవ వలసిన పుస్తకం.

రచయిత ముందు ముందు 

ఇంకా మంచి రచనలు 

తీసుకుని వస్తారని ఆశిద్దాం.